Adat nan Basandi Syarak, Syarak Basandi Kitabullah

Assalamualaikum Warahmatullahi wa barakatuh

Manolah Niniak Mamak, Alim Ulamo, Cadiak Pandai sarato Bundo Kanduang limpapeh rumah gadang di Minangkabau, sakali ambo maimbau, walau cuman itu nan taimbau, batin dek adat kasamonyo, pangana batin ka dunsanak sadonyo, ujuiknyo sambah ka nan banyak.

Sambah sujuik sambah tasimpuah , sabarek bungka nan piawai, indak basibak jo basisie, bukan bahinggo jobabateh.

Ujuiknyo sambah nan taunjuak, nyato tawalak ka ukuran, tabayang barieh jo balabeh, bana bak andai kato bida.

Niniak Mamak, Alim Ulamo, Cadiak Pandai. Bundokanduang limpapeh rumah nan gadang, umbun puro pagangan kunci, pagangan kunci aluang bunian, pusek jalo kumpulan tali, sumarak dalam nagari, hiasan didalam kampuang, nan gadang basa batuah, kok iduik tampek banasa, kok mati tampek baniat, kaunduang unduang ka Madinah, ka payuang panji ka Sarugo.

Ujuik tujuan buah rundingan, sakiro paham di kahandaki, bahubuang jo maso nan ditampuah, musim nan tumbuah iko kini, syari’at ado bahakikat, lahie kulik manganduang isi, di bumi nan tampak nyato, didalam pandangan ulemu, tiliek nyato paham mamanjek, di jauhari simpanan kato, jikok aka dijalankan, jotanang budi marangkak, kateh alah taambun jantan, kabawah jaleh takasiak bulan, sampang tabagi dek ulemu, lahie manjadi buah ama, dek enggeran soko nan tatagak. Koto aman alam santoso, salamat koroang jo kampuang, makmur anak jo kamanakan, dunie bulieh akhirat dapek, sinan mardeka makonyo panuah.

Tapi sungguahpun baitu, kalau ditiliak nyato-nyato, jikok dipandang sungguah sungguah, dimainkan ereng jo gendeng, dipakaikan raso jo pareso, nyato basuo kato papatah “Bakarih si kati muno, patah lai basimpai alun, ratak sabuah jadi tuah, kalau di bukak pusako lamo, dibangkik tareh nan tarandam, lah banyak ragi nan barubah, iyo bana bak pantun adat:
Bulek ruponyo daun nipah
Bulek nan nyato bapasagi
Diliek lipek tak barubah
Dibukak lak tambuak tiok ragi

Jalan dialiah dek rang lalu, cupak dipapeh rang manggalaeh, adat di aliah dek rang datang. Ukhuwah jo jangko kok tak tarang, susunan niniek muyang kito, dek rancak kilek loyang datang intan disangko kilek kaco.

Lilek baliuang lah ka kaki, kolek camin lah ka muko, gabak dihulu tando kaujan, cewang dilangik tando kapaneh.

Kalau malantai sabalun lapuakjikok maminteh sabalun anyuik, ingek samantaro alun kanai.
Di dorok cando nan bak kian, tumbuahlah niaik dalam hati, kacalak calak ganti asah, parintang wakatu manjalang babuko, handak baraja adaat jo istiadat pusako tuo warih miniak muyang kito.

Satantang diri ambo nanko, lah banyak tabang dari inggok, umua habih tapakai di rantau urang, kok dietong kurun jo wakatu, iyolah hampia sapatigo abad.

Niniak mamak alim ulamo, cadiak pandai sanak sudaro, ketek indak basabuikan namo, gadang indak bapanggia gala, bari izin ambo ba makmum, bari bairiang ambo ba jalan. Kok jalan luruih nan kaditampuah, adat nan basandi syarak, syarak basandi kitabullah, syarak mangato adaik mamakai di sinan ambo ka munuruik.

Manusia basifat khilaf, Allah hanyo nan Qadim, kok basuo khilaf jo kilafat, indak di kasad di sangajo ampun jo maaf ambo pintakan.

Disusun jari nan sapuluah, disusun lutuik nan duo, kok ado kato bana bukan anjak dek dunsanak ka nan bana.

Wassalamualaikum Wr. Wb.

Iklan

7 Comment(s)

  1. JB'lOg

    Mei 31, 2008 pukul 8:14 am

    Bulek ruponyo daun nipah
    Bulek nan nyato bapasagi
    Diliek lipek tak barubah
    Dibukak lak tambuak tiok ragi

    sairiang salam jo pasambahan
    sacabiak siriah
    sakupia pinang
    sabatang rokok

    iko Blog nan sangat mencerahkan
    untuak generasi Minangkabau nan kagadang
    supaya rumah gadang dak runtuah dilamun galombang

    Panakiak pisau sirawik
    ambiak galah batang lintabuang
    silodang ambiak ka nyiru
    tiok titiak kato dalam blogku jadikan lawik
    sakalimat jadikan gunuang
    Minangkabau tetap tagak manyatu

    Salam kenal dunsanak
    Salam Jabek Arek
    Alang Babega



  2. delfisyar mara st. maraji

    Desember 18, 2008 pukul 11:35 pm

    Ambo taragak jo pantun danpepatah minang ba-a caronyo Wan



  3. urang awak juo

    Juni 17, 2009 pukul 11:05 pm

    Yo bana manyantuah sanak . . . .



  4. Sutan Rajo Indah

    November 3, 2009 pukul 8:35 am

    Yo wan…awak pun baitu pulo…yo taragak jo pantun dan patitiah minang…bia ndak tambah lupo jo adat nan basandi sarak tu wan..tksh



  5. nola

    Juni 11, 2010 pukul 9:59 am

    pembelajaran yang baru bagi sayu. sukses



  6. Achdiat Agoes

    Desember 4, 2013 pukul 10:27 pm

    Kami urang rantau sabana taragak jo pantun nan dunsanak buek, izinkan lah kami mangutip untuak dibagi ka dunsanak di rantau. Kami tingga di Malang, ado sakiro seribu limo ratuih urang awak tingga di kota Malang ko….



Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s


%d blogger menyukai ini: