Kalau dek pandang sapinteh lalu
Banyak pahamnyo taguliciak
Pandai tak rago baguru
Salam tak sampai kakasiak

Sadangkan baguru kapalang aja
Lai bak bungo kambang tak jadi
Kok kunun dapek dek mandanga
Tidak didalam dihalusi

Karuak kok tak sahabih gauang
Mahawai tak sahabih raso
Banyak pahamnyo nan tak langsuang
Batuka dari mukasuiknyo

Sabab karano dek baitu
Timbualah niaik cinto hati
Nak marunuik tambo nan dahulu
Sajarah adat nan usali

Hambo nan indak cadiak pandai
Hanyo manjawek dari guru
Pituah guru dipaberai
Nan jadi paham jo ulemu

Sangajo guno diuraikan
Kahadapan sidang nan basamo
Untuak nak samo dipikiakan
Nak samo dirunuik tujuannyo

Manuruik warih nan dijawek, kato pusako nan ditolong, kaba usali nan dahulu, kok gunuang sabingkah tanah, bumiko sapahimbauan, kok lauik sacampak jalo, tanah darek balun lai leba, nan timbuah gunung barapi. Lorong nan niniak muyang kito, asa usuanyo kalau dikaji didalam tarambo lamo, sapiah balahan tigo jurai, asa nan dari banua ruhum. Nan tuo Maharajo Alif, nan tingga dibanua ruhum, nan tangah Maharajo Depang, nan jatuah kabanua Cino, nan bongsu Maharajo Dirajo, nan turun kapulau Ameh nangko. Warisan nenek muyang, nan takarang di tarambo, nan satitiak bapantang lipua, sabarih bapantang hilang, sampai sakarang iko kini, lah babilang abad nan talampau. Lah labiah saribu tahun, tak tantu masim nan talansuang, dalam pangakuan urang juo, sakato juo tantang itu. Manuruik carito tambo alam, nan bongsu Maharajo Dirajo, nan jatuah kapulau Ameh nangko, takato maso dahulu, samusim kato saisuak, iyo bak kato pusako:
Dimano disalai palito
Dibaliak telong nan batali
Dimano turun niniak kito
Diateh gunuang barapi

Baentak turun kabawah, dibawah labuhan si Timbago, lah tibo di Guguak Ampang, dilinggundi nan baselo. Disitulah mulo bataratak, mambuek tampek masiang masiang, bakeh diam sorang-sorang sabalum bakorong jo bakampuang, sabalum bakoto banagari. Disitulah mula macancang jo malacah, jolong malambeh jo malamun, mako batanam baro bilah. Mako ditarukolah sawah lading, dilambeh hutan jo baluka, dirambah samak jo rimbo dalam, dilambang bumi tanah subur. Jadilah sawah gadang satampang baniah, makanan urang tigo Luhak nan dibuek niniek kito, Datuak Tantejo Garhano, niniak Kolat namo ibunyo, Indobijo namo bapaknyo, nan manurang sambia tagak, nan ma atok sambia duduak. Habih tahun babilang musim, bumi bulek alam baputa, siang jo malam dek baganti, aia kian lamo makin susuik, bumi batambah laweh juo, daratan batukuak leba, lah lapang alam bakeh diam, urang batambah kambang pulo, gunuang makin lamo makin tinggi, aka batambah manjala, budi batukuak marangkak, ditambah pulo tampek diam, diansua basentak turun, Diasah padang nan panjang, alat pakakeh dipatajam, dirateh baluka nan lah kariang, dirambah samak nan lah masiak. Dek bana paham saukua, cinto basamo kanan elok, hilia tak rago dek dikayuah, mudiak tak rago dek digalah, lah basicapek nak dahulu, basikuek nak mangabiah, Nan diri Maharajo Dirajo, hutang mairik mamuloi, disentak padang nan panjang, dirambah samak jo baluka, urang nan banyak manuruti, paguno pakakeh tajam, lah basicapek kuek sajo, didorong dek kandak bana, sasuai jo kandak hati, nan gurindam kato bida:
Lauik ditimbo mungkin kariang
Gunuang diruntuah amuah data
Dek samuik lai runtuah tabiang
Apo lai dek manusia nan baraka

Dek baiak paham sasuai, dek elok bana saukuran, mambayang tuah disakato, tacapai niat jo tujuan, lah alah samak jo baluka, rimbo dalam nan lah tarang, lah laweh tampat kadiaman, mulai dibuek rumah tanggo, disusun korong nan jo kampuang, timbualah mufakat jo sakato, dibuek tapian tampek mandi, dibantangkan jalan labuah golong. Dek buliah nan diagak, lah dapek nan cinto hati, niaik sampak kaua salamaik, lah samo bahati riang, suko lah lahia kabuatan,. Lah bakorong jo bakampuang, diadokan tampek bahimpun, bakeh basuko-suko hati, kajadi tampek pamedanan, himpunan paubek jariah, nak riang hati nan basamo, jariah jo payah lah bajaso, Sampai sakarang iko kini, banamo kampuang Pariangan, duo jo Padang Panjang, dek malambeh jo Padang Panjang lah jadi kampuang jo nagari, riang hati kasamonyo, baitu kato dalam tambo. Adopun nan kampuang Pariangan, duo jo koto Padang Panjang, dibawah linggundi nan baselo, jo sawah gadang satampang baniah, kurang bana tanah nan data, Dek lamo bakalamoan, putaran tak baranti, tahun baganti, zaman baedar, urang makin lamo makin rami, rakyat batambah kambang juo. Lah sasak nagari Pariangan, duo koto Padang Panjang,dipindahkan urang limo kaum, dibuek koto duo baleh, katanah data nan lai laweh, sabalah bawah Pariangan jo Padang Panjang, sabalah mandun jo selatan dikaki gunuang Marapi. Disitu ditaruko pulo sawah jo ladang, dibuek tabek jo tapian, dibuek jalan labuah golong, badirilah korong jo kampuang, mulailah dari taratak sampai bakoto, banagari. Tatkalo samaso itu, lah patuik ado nan kuaso, untuak karuah ampajaniah, hukum mahukum dalam kampuang, dibawah Maharajo Dirajo, sabagai ayam nan bainduak, sipatan siriah nan bagagang, didirikan lah balai balerong, panjang nan tujuah baleh ruang, usaho niniak muyang kito Datuak Tantejogarhano, itulah nan diatok sambia duduak, nan diturang sambia tagak, di tabek dakek sawah tangah.

Dibalai panjang itulah mulo-mulo badiri undang-undang pahukum mano nan salah, pamarentahi koto jo nagari, sampai kadusun korong kampuang, lalu kataratak pandangauan. Takalo samaso itu tigo undang-undang nan badiri, tigo adat nan bapakai didalam koto jo nagari, sampai kadusun nan baumpuak, lalu kakoto nan bajerong. Partamo banamo simumbang jatuah Nan tidak tasangkuik tasampang, tidak tasingguang tadaguah, nan bak umpamo aia hilia, bak hujan jatuah kakasiak, Kok tumbuah silang jo salisiah, sangketo damdam jo kasumat, didalam koto jo nagari, lah sampai hukum bahukum, diateh balai balerong, hukum tak buliah dibandiang, kato tak buliah di musiah, rundiang tak buliah disalokai, bana tak buliah disabuik, Hukum jatuah wajib dituruik-i , takadia pantang disanggah, walau zalim wajib disambah, hukum putuih parentah jatuah, hukum pancuang paralu putuih, hukum bunuah matilah badan, hukum buang jauahlah diri, hukum gantuang tinggilah bangkai, tak buliah dibandiang lai. Hukum putuih badan bapancuang, bapanggang kadalam api, dengan sakiro kalahiran, lah banyak mati basabab, Hukum bak rupo mumbang jatuah, bak hujan jatuah kakasiak, baitu uundang-undangnyo baitu tata barihnyo,nan takarang ditarambo. Kaduo sigamak-gamak Kok ado karajo nan dikakok ataupun barang nan dibuek, basicapek nak dahulu, basikuek nak mangabiah, mano nan tampak lah diambiak, mano nan ado dikarajoan, indak dikana awa jo akhia, raso pariso tak ditaruah, asa dapek lah manjadi, sabaiakbaiak pakarajoan, saelok-elok aka budi, hinggo mukaruah maso kini, baitu tasuo ditarambo. Katigo silamo-lamo Babana kapangka langan, batareh kaampu kaki, basasi kaujuang tapak, Nan kareh makanan takiak,kok lunak makanan sudu, nan pantai batitih, nan lamah makanan rajiah. Kok ado batang nan malintang, dikarek dikabuang-kabuang, diputuih dikuduang tigo, Kok lai dahan nan mahambek dikupak dipatah duo, kok tampak rantiang nan kamangaik disakah dipalituakan, atau runciang nan kamancucuak ditukua dipumpum ujuang. Nan tingggi timpo manimpo, kok nan gadang endan maendan, kok panjang kabek mangabek, nan laweh saok manyaok. Dek tahun musim baganti, dek zaman tuka batuka, dek lamo maso nan talampau, tahun jo musim nan talansuang tasuo kato bida adat:
Sakali aia gadang
Sakali tapian baraliah
Aka makin lamo makin panjang
Karuah makin lamo makin janiah

Antah barapo kalamonyo undang-undang nan tigo balakunyo, tidak tatulih dalam tambo, hanyo dimaso nan kudian, samaso Suri Dirajo tidak tapakai nan baitu, nan bak bida adat juo “sakali gadang balega, sakali adat barubah”. Takalo samaso itu nan diri Suri Dirajo maniliak hukuman nan balansuang, undangundang nan balaku, lah nyato indak dalam bana, dikana akibatnyo nan lah langsuang, banyak urang nan tak salah, nan lah kanai dek hukuman, tidak nan salah nan batimbang bukan bautang nan mambaia. Tidak nan lain karanonyo dek bana indak buliah disabuik kato tak buliah dimusiah, hukum tak buliah dibandiang, sasek dek tak buliah suruik, salah tak dapek minta ampun. Maniliak caro nan bak kian, timbualah insaf dalam hati, rahim dihati lah mandatang, dicari caro nan kabaiak, rakyat nan banyak nak santoso, adia hukuman nak tapakai. Sajak gadang lah balega kapado Suri Dirajo adat barubah hanyo lai, undang-undang lamo nan lah lipua, caro aturan lah batuka. Kato lah dapek dimusiah, rundiang lah dapek disalokai, hukum lah buliah dibandiang, bana lah dapek disabuuik, kok sasek lah buliah suruik, talangkah buliah kumbali, barek lah dapek minta ringan, salah ado dapek ampun, maniliak tampek tumbuahnyo, Budilah lah mulai dianjuang, raso pareso lah dipakai, sopan jo santun lah ditaruah, lah mulo aman korong kampuang, santoso anak kamanakan. Kok mati lah dikanduang tanah Hiduik lah dikanduang bana. Lah tatap hak jo amanah. Hiduik lah kana mangana.

Catatan:
Tambo dan silsilah adat Minangkabau ini ditulis ulang menurut aslinya dari buku karangan, B. Datuak Nagari Basa. Terbitan CV. Eleonora, Payakumbuh

Oleh : Husni, husni@minangmedia.com, http://husni.minangmedia.com